安心的士偷情　傅嘉莉被重提激咀男士：我…

藝人傅嘉莉（Kelly）以交通安全大使身份出席中西區交通安全嘉年華，講到許志安和黃心穎因在的士上被爆出「偷情事件」，令不少網民即重提Kelly當年在的士車廂中激咀男士一幕，可覺得躺着也中搶？Kelly謂：「冇睇過類似報道，而我覺得件事已過咗去，我只會努力做好自己嘅工作，因為剛一部戲煞科緊接又要開第二部。（會唔會搭的士都留意吓有冇攝錄機？）好多時都冇特別留意，不過若果着裙上落車都會小心啲，怕影到走光。」

另外，她稱剛來活動前就險些有交通意外，弟弟駕車載她來中環時，去到皇后大道中，右邊快綫的的士見到有客，即切三綫過最左行車綫上客，弟弟駕車正在中綫，好彩反應快煞停才沒撞上的士，因車上除了她和弟弟，還有母親及家人：「我明白的士司機急住接客，但都要守法去避免交通。（弟弟有冇好嬲？）有呀，有開窗同司機理論，但司機都冇理囉。」而Kelly稱自己都有車牌，但很少駕車，因有時拍劇收工都好攰好眼瞓：「酒後唔准開車，其實太攰太眼瞓都一定唔適宜開車。」