《愛回家》帶挈搵銀！呂慧儀爆周嘉洛被詐型

「長腳蟹」呂慧儀和「金城安」周嘉洛到大角咀出席新店剪綵活動，吸引大批粉絲到場塞滿通道。受訪時呂慧儀搞笑封嘉洛為「11廠嘉洛哥」，而嘉洛則謂：「你仲犀利，係TVB蟹姐喎。」阿蟹大爆嘉洛近日外快多收入好，但卻遲遲未有請《愛．回家之開心速遞》拍檔食飯，結果遭劉丹（丹爺）詐型，嘉洛即謂：「丹爺根本唔在乎，咁我嘅生活係簡單輕鬆咗嘅（拍收入增），不過一直需求唔多，講到儲錢買樓車尾燈都未見！」

阿蟹被問到早前公開收花照，她連聲否認有追求者：「收花係開心嘅，只係就嚟到母親節，啲花係相熟花店送畀我，我幫佢哋甫吓相啫。（你留言話相信愛情喎。）咁我依然相會相親相愛嘅，不過我重心放喺事業同老闆（即囝囝）身上。（有追求者？）唔得閒呀，要返工，老闆考小學我要伴讀，跟佢一齊學普通話。」她指已收到囝囝的母親節小手作，還寫上「I Love You」，令她相當窩心。問到前夫黃文廸有否幫手湊仔，阿蟹坦言：「佢哋有見，揀學校亦有商有量嘅，詳情唔講太多。」