《愛．回家》細路講綠帽　網民諗起黃心穎

東網電視

咁啱嘅？

依家大家睇《愛．回家之開心速遞》終於唔使再聽到黃心穎唱主題曲，唔少網民都拍手叫好，但尋日嗰集「你愛的人，愛你的人」竟然令觀眾諗起黃心穎！？

話說送水輝（許家傑飾）出現情敵Jacky（黎振燁飾），阿仔飛立就揸住本雜誌問爸爸：「係咪佢搶咗Linda（林淑敏飾）？衰人，畀綠帽我爸爸戴？」嚇到送水輝就問：「邊個咁教你㗎？」飛立就話係電視囉！送水輝就叫阿仔以後唔好咁講喇！

之後，飛立就同同學仔呻，兩人咁啱遇見Jacky，就夾手夾腳整蠱對方，仲出口成文「天堂有路佢不走　地獄無門佢闖進來」、「龍游淺水遭蝦戲　虎落平陽被犬欺」！

網民都話人細鬼大好抵死，雖然劇情就同黃心穎許志安偷食無關，但「綠帽」就令人聯想起主唱黃心穎畀綠帽馬國明戴喇！

on.cc東網