神算軒重出江湖！王梓軒叫人計數九唔答八

唱作歌手王梓軒當年主持《Big Boys Club》訪問李逸朗時，對方提到曾經喺北京打工，任職一份日薪只有百幾蚊人民幣嘅大廈外牆玻璃清潔工，王梓軒一句神回：「百幾蚊1日，1個月都成3萬幾蚊。」被網民冊封做「神算軒」，事隔幾年，佢又出山喇！

話話佢參演咗由汪明荃、森美、蘇永康等主持嘅《娛樂大家》，其中一個遊戲環節「Cheat Chat」係大家頭頂插上「炸彈」，其他人要令當事人提及「炸彈」自爆！

而王梓軒就為咗攻擊頭頂「提及網購」嘅戴祖儀，於是提出一條「問題」，大家都好細心聆聽，佢就問：「我網上買嘢，一條裙幾多錢？1…2…3…300蚊！」呢個Moment，真係唔知有幾多烏鴉飛過，全場靜晒後爆笑，大家都唔明佢想講乜，第一：呢條唔係問題，第二：自問自答，連汪阿姐都忍唔住問：「你想講咩啫？」森美都話：「全港小學生都答唔到！」被大家強力恥笑嘅神算軒似乎唔知「出事」，仲一面戇直死撐：「我唔係計數㗎，我靠靈感㗎咋！」旁邊嘅楊千嬅已經笑到標眼水，網民都笑言叫佢都係返去唱歌好啦！