【黑寡婦女武神呢】女超英齊集有戲開？

《復仇者聯盟4：終局之戰》上咗成個禮拜，除咗票房大收之外，電影中唔少劇情都係熱討話題，好似其中一幕成班女超英保護蜘蛛仔運送無限手套，就有人再次提出係咪應該拍番套全女班上陣，女超英大集結嘅電影呢？呢日「鐵甲奇俠」羅拔唐尼（Robert Downey Jr.）喺社交網甫出兩張成班女超英坐埋食飯嘅相片，唔通娘子軍超英片有望開拍？

睇番羅拔唐尼嘅留言，原來呢張相係拍攝期間影落，成班人喺佢專用餐廳入面開餐，當中包括：小辣椒、螳臂女、Captain Marvel、嘉魔娜、黃蜂女、黑豹侍衞長、紅女巫、Nebula、黑豹妹妹，但係就唔見咗黑寡婦同埋女武神，有網民搞笑話Scarlett Johansson可能去咗拍黑寡婦外傳，而Tessa Thompson就拍緊《黑超特警組3》所以冇嚟到。