諗過轉行！邱芷微打兩份工追夢

歌手邱芷微（Chelffy）日前為新進樂隊組合RF2嘅音樂會擔任表演嘉賓，支持年輕人追夢。活動中各人分享追夢嘅過程與感受，Chelffy表示曾試過轉行：「有段時間冇幕前演出工作就走去打寫字樓工，起碼有底薪可以自給自足唔使父母擔心。但後來演藝工作機會愈嚟愈多，當時我試過日頭返工，放工就走去拍攝，然後半夜回家瞓幾粒鐘又繼續返工。呢啲生活維持咗兩年多，雖然辛苦但好開心慢慢累積咗唔少幕前演出經驗。」

近日開始創辦健康購物網生意嘅Chelffy ，指依家都係打兩份工：「要為將來打算，始終唔能夠成世靠做幕前工作維生，所以依家辛苦少少就算演藝工作幾忙，都會堅持處理生意上嘅文書工作及送貨。（唔覺得辛苦？）哈哈，追夢就係咁，鬼叫我要儲錢出歌咩！」