劉小慧蘇志威拍住上 開Live踢走濕疹!

20190507
東網電視
更多新聞短片
兩公婆打孖上!
藝人劉小慧早前宣布「復出」後,頻頻喺社交網開Live,唔單止介紹大家食「好西」,最近仲分紓緩濕疹妙法,即引起網友熱議。見大家反應咁熱烈,佢呢日就「食住個勢」,請嚟患有嚴重濕疹嘅朋友分享親身經歷,仲搵埋老公蘇志威出鏡,落手落腳製作紓緩濕疹嘅自家雞蛋油配方,實行夫妻檔拍住上!
片中見蘇志威笑言要「雪恥」,負責炒雞蛋油,話要證明自己煮得兩手,點知就畀老婆窒佢:「呢個配方係用嚟搽又唔係食!」蘇志威就表示:「就證明我煮嘅嘢唔食得囉!」兩公婆互動相當搞笑!蘇志威更笑說大隻唔係靠健身,而係經常被老婆吩咐拋鑊。期間劉小慧更透露有藝人朋友唇上生疱疹,但嘗試其療法後得以好轉,但表明唔准公開身份,以免外界產生不必要嘅誤會。此時,蘇志威竟大爆係最近與佢哋聚餐嘅朋友,劉小慧即急忙阻止「爆響口」。
身為廿四孝老公嘅蘇志威仲喺社交網開甫宣傳,留言大讚老婆認真:「凌晨1:47仲覆緊D(啲)留言,好耐冇見過劉小慧認真做一件事,希望佢今日個FB live可以幫助到身邊嘅濕疹朋友。」並笑指:「最大鑊係阻住我兩點鐘睇世界桌球錦標賽決賽直播!」