每2年同無綫傾合約　汪明荃：冇唔開心嘢！

藝人汪明荃現身電視城為無綫節目《娛樂大家》錄影。對於老公羅家英早前大爆資深演員劉兆銘多年前與無綫續約，無端被Cut至一年一騷，劉兆銘事後亦慨嘆無綫「人面全非」，阿姐即謂：「我冇聽過呢件事，但我諗羅家英係講緊好耐之前嘅。（話60歲就被迫改簽一年一騷？）依家已經唔係啦。其實藝人同公司可以有唔同嘅合作方式，要睇公司、市場及藝人本身嘅需要，睇本身需要。」

談到劉兆銘指無綫人情味不及以往，阿姐表示：「始終都係一門生意，有變動藝員要配合，正如大家成日同唔同嘅拍檔合作，佢都應該冇適應嘅問題嘅。」她又坦言自己與無綫合約每兩年傾談一次，亦沒有「唔開心嘢」發生：「40幾年都咁（做），只係依家拍劇覺得攰，所以冇拍。（遇到好劇本呢？）咁會考慮，始終演戲係我本行。（講明休息時間？）會，不過有時好難完全配合，好似人哋借場畀你，點即刻收工呢？」