踩四吋高踭狂仆！欣宜夜蒲直落飲茶成往事

演員鄭欣宜、何珮瑜、連詩雅、雨僑等到蘭桂坊出席網劇《性敢中環》記招。欣宜在劇中有大膽演出，她笑說：「入行啲人教我唔好做嘅嘢劇裏面都做晒，裏面做一個幼稚園教師，但係鍾意夜蒲、劈酒，有大膽嘅床戲、激情戲，不過只係意識上大膽，但係好彩對手係鄧健泓，變咗唔尷尬。」

欣宜自爆年少時經常穿上四吋高踭鞋到蘭桂坊夜蒲，但亦因高踭鞋太高經常仆低，她笑言：「姐姐老喇，收咗山好耐，以前夜蒲完第二朝可以同屋企人去飲茶，依家要兩日先可以回氣，可能啲quota已經用晒。」她又指以前夜蒲主要跟女仔朋友跳舞，少有為了識男仔。