鄭俊弘下月重拍《法證IV》 增肥10磅襯靚湯

20190509
東網電視
更多新聞短片
鄭俊弘留長頭髮重拍《法證先鋒IV》。
歌手陳柏宇(Jason)拍住一對戀人鄭俊弘(Fred)及何雁詩(Stephanie),組隊現身粉嶺香港高爾夫球會參加「盈豐香港女子高爾夫球公開賽頒獎禮」。身為「電燈膽」的Jason笑言已經習慣晒,因為之前私下都有一齊打過波:「我嘅波齡都有4年,但幾年前見過Fred打過一次就冇再見到佢。」Fred就解釋:「打打吓冇再練,打完覺得冇乜興趣。」女友Stephanie「突破盲點」謂:「因為你當時未遇到我⋯呢個波友!」認真冤氣!
問到有20年打波經驗的Stephanie覺得男友抑或Jason球技較好?她老師上身「評價」指前者姿勢方面有天分,而後者則有運氣天分:「雖然Fred玩得4個月,仲係小BB班,但佢哋兩個好夾,試過去旅行打波,佢哋成Pair孖公仔咁!(打波期間會唔會有拗撬?)冇,打波都係鬧自己多。」提到她的腳傷,她坦言都有影響表現,今次更是第一次帶傷上陣:「好多時發力都係集中喺左腳膝頭,會發軟蹄,就好似傷風唱歌一樣。」
問到三人之後可會再一齊參加比賽?Jason搶話:「冇資格參加,或者可以玩業餘興趣比賽。」並表示等愛囡Abigail長大後會教她打高爾夫球:「但自己依家要打多啲先,小朋友學嘢好快,唔想差佢太多。」
至於講到無綫劇集《法證先鋒IV》已落實由湯洛雯(靚湯)取代偷食人夫的黃心穎一角,Fred透露已度期於下個月重拍:「可以再同靚湯合作,我啲頭髮都要留番長啲,都同髮型師溝通咗。(靚湯要減10磅。)係呀,或者我哋全部人增肥10磅,哈哈!」