去夏威夷做足準備　陳瀅預告三套泳衣任揀

藝人陳瀅今日為仁濟醫院賣旗，呼籲支持器官捐贈，她表示是首次參與賣旗，因為她在外國長大，當地一般賣餅及賣蛋糕籌款：「我都有簽器官捐贈卡，但係婆婆就唔係咁鍾意，因為老人家思想比較傳統，想死後有全屍，不過我覺得個人唔喺度都可以幫到人，好有意義。」首次賣旗的她坦言感受到很多正能量，她笑言若有市民向她集郵，她會叫對方買旗作交換。

另外，陳瀅透露明天開始放假，會先回溫哥華探望婆婆，再到夏威夷出席朋友的婚禮：「我最近好勤力做gym，第一次去夏威夷，買咗三套泳衣，有一件頭同兩件頭，睇吓到時身形操成點再決定着邊套。（同邊個一齊去？）有男有女，都係舊同學，好難得成班人一齊去外地，可以有多啲時間相處。」她稱會離港兩星期，返港後又要到內地拍劇。