董敏莉呻爆育嬰室配套不足　囡囡等到喊！

相信每位新手媽媽出街時都會經歷要搵育嬰室餵奶同換片嘅問題，育有一女嘅董敏莉（Monie）都遇到呢個問題，今日佢喺網上發文話育嬰室不足兼衞生情況不佳嘅問題，確實令好多媽媽好頭痕呀！Monie話：「話說今日子子幫襯咗兩間育嬰室，一間喺酒店，一間喺尖沙咀商場。酒店嗰間空間不足，而且非常嗅（臭），枱面仲有用完的濕紙巾，非常唔衞生。子子一瞓上換片墊就即刻喊，所以嗱嗱聲換完走人。」到去到商場時，雖然呢個育嬰室比較乾淨，不過皆因得一間，所以就要排隊：「整個商場只有一間育嬰室，連清潔姐姐都話太少，仲叫我去投訴，只好在門外等候......等了又等，子子開始喊。」最終Monie只可喺換片旁梳化餵奶：「好彩無人，因為之前這些位置坐滿了爸爸，不過感覺不安，因為一開門就被人見到！唉！又話鼓勵母乳餵哺，配套不足如何是好？」相信呢個問題唔少媽媽都有同感！