爆安仔失蹤 吳國敬搞大女友個肚先結婚

2019年05月16日 04:41
東網電視
更多新聞短片
吳國敬與女友拍拖多年,感情穩定。

歌手吳國敬到電視城錄影《流行經典50年》節目,聲沙沙的他表示打了類固醇才過來:「跑完步諗住返到屋企就開番聲,點知發現聲帶好腫、有少少發炎,所以去打咗類固醇,其實都唔想打,因為會令到啲骨脆,所以今日盡量唱,星期六上嚟再唱過。」他又透露籌備出第一首國語歌:「搵咗當年《玩火》嘅監製幫我做,但佢要求好高,我寫咗十幾廿首歌畀佢都未揀到。」

問可有慰問好友許志安?他說:「有慰問、有WhatsApp,但冇見面,搵唔到佢,唔想騷擾佢,會支持佢做好之後嘅嘢,過去嘅嘢唔好提,放眼將來。(有冇慰問鄭秀文?)都係一樣,一句問候就得,在心中,我哋呢啲外面嘅人唔敢有太多言論,朋友就一定會支持。」問多年來可試過遇到誘惑? 他笑言:「我個底好似幾好㗎喎,冇乜緋聞,可能因為我怕老婆(女友)啦,我嗰個都幾巴辣,係辣椒仔,我對佢又愛又怕。雖然都幾多誘惑,行內行外都有啲,但把持得到。」

問何時與女友結婚?他即作狀抹汗:「真係標汗,其實呢,一係就唔搞,一搞就連埋百日宴一齊搞。(幾時搞?)未話得埋,呢啲話嚟就嚟。」問有喜事宣布?他扮神秘說:「講住先啦,依家係佢唔肯嫁,係都要我寫多幾首冧歌先。(真係有咗?)有咗共識,雙喜臨門,到時先算。」