照Dub王菲？李亞鵬新歡獻唱網友激讚靚聲

內地男星李亞鵬與王菲離婚6年，近月先後被拍得與一位「翻版王菲」的神秘女子拖手出巡，尋日更公開認愛落實女友身份，澄清愛人只係一位愛唱爵士的文字工作者，點知今日即有網友晒出李亞鵬女友街頭獻唱嘅片，靚聲程度絕不比王菲遜色！

獲男友認證愛唱爵士嘅新歡，被網友喺社交網甫相甫片，指早前喺街頭偶遇李亞鵬新歡，對方仲大玩Busking獻聲，大唱已故男歌手Louis Armstrong名曲《What A Wonderful World》，聲線厚實有質感，配合音樂又揈手又指地，齋晒靚聲就已經俘虜一班網友，佢哋仲搞咗個#李亞鵬女友近照#標籤，睇嚟佢唱多幾次分分鐘有埋歌迷會呀。

而今次李亞鵬新歡嘅一身打扮亦相當「王菲」，一身黑色造型配花色絲巾，法式打扮優雅又有氣質，獨特嘅Feel真係似足王菲，身形高挑嘅佢一頭乾淨短髮加埋黑超遮眼，唔認真睇真係以為係王菲真人出嚟同大家唱歌。