影咗床照都唔知!姚子羚:驚訝點解會流出

20190519
東網電視
更多新聞短片
姚子羚話影咗床照都唔知!
藝人姚子羚捲入四角戀,佢下午六時四十五分左右現身電視城,為事件解畫!
戴住帽嘅姚子羚一現身,即時引起哄動,有傳媒仲跌爛相機!佢話:「我想講,我同Raymond一齊時,佢同Sarika(蔡宛珊)已經分開咗。我同Sarika都認識,Sarika都知我哋拍拖。」佢指依家同Raymond分咗手,做番普通朋友,但就冇講拍咗幾耐拖,同埋幾時甩拖。問到有冇介入人哋婚姻?佢話:「頭先都講咗,佢哋分開咗先一齊。(分手幾耐?)唔想多講。(有冇諗過啲相點流出嚟?有冇懷疑?)有,但依家唔想去深究啲相點流出,覺得好驚訝,點解兩個人咁親密照片會流出嚟。(啲相幾多人擁有?)唔應該問我,某啲相我都有。(床照影咗都唔知?)唔知。(應該得一個人有?)如果有過分嘅事,我都會同公司講。」
問覺唔覺得遇人不淑同埋有冇好嬲?佢話:「未有時間去嬲!(有冇更激照片、短片?)我唔知。我想澄清番,我同Raymond一齊時,佢已經單身。」事件過後,佢都話有同Raymond聯絡,又指自己係一個對感情好認真嘅女仔:「我對感情好認真,希望關係好簡單!」
講到拍緊劇集《唐人街》嘅佢,工作有冇受影響時,佢話一切正常:「做番演員本分,冇收通知,拍好套劇!」而子羚全程保持微笑,又不時雙手合十,受訪後佢就匆匆趕去開工。