神不守舍以為鬼上身　少爺占驚覺患流感

電台DJ甄子康（少爺占）鏡頭前相當生鬼，點知今日佢喺社交網透露患上流感！佢上載一張瞓床扁嘴相，話星期一晚正準備揸車返公司嘅時候，突然間發覺自己有啲神不守舍，即刻揸一揸自己中指，笑言驚鬼上身！

點知做完節目返屋企後，發覺成身骨痛然後發燒，點知食退燒藥後瞓着覺又冇事，但到咗星期二下晝突然間又「沾寒沾凍」，又再發燒：「我突然間諗，我應該係流感，於是深夜去咗睇醫生，同醫生講我唔做測試啦，我講啲症狀俾（畀）你聽啦。」醫生回覆佢：「你好大機會係流感！」少爺占為了爭取黃金48小時，主動向醫生提出食特敏福：「我話我要即刻食特敏福，唔可以錯過黃金48小時！醫生先係呆一呆，然後話『可以架（㗎）！』」

少爺占慨嘆：「冇乞嗤，冇鼻水，冇咳冇剩，冇啦啦流感。不過有啦啦嗰啲通常都唔荒好嘢。」