蔡一智被困機艙幾粒鐘　網民又諗起黃心穎

前港姐亞軍黃心穎上月被爆偷人夫許志安後，禍及唔少人，包括同佢撞樣嘅蔡一智，唔少網民去到佢社交網留言狂鬧，非常無辜！事隔成個月，一智今日上載喺飛機中嘅自拍，不過佢就好無奈，上咗機幾粒鐘都未起飛：「思考人生最容易發生喺...夜機急趕回家途中，上了機，數個鐘都未起飛，然後說空管.......等排隊然后.......仲派水派小吃.....時間就是這樣發生巨變，像在太空漫遊！所有空氣都凝固.............人變得越（愈）來越（愈）...........音樂由陳慧嫻的夜機.......變成譚詠麟的世界停頓................................」

不過亮點就落喺佢個口罩度，「黃心穎」三隻字又再出現喺留言，皆因佢同心穎被發現「着草」去美國洛杉磯時，所戴嘅口罩一樣！有網民留言：「熟悉的口罩」、「一穎bb 你去邊呀？」、「玩到上飛機」、「穎穎又想咀邊個?」大家相信大家今次係講笑，唔係鬧嘅！