9月開課　苟芸慧上堂整夠500粒鐘甜品

藝人苟芸慧出席「煤氣烹飪中心X法國Disciples Escoffier專業烹飪文憑」記者會，戴上閃爆婚戒整甜品的她，透露老公陸漢洋最喜歡她炮製疏乎厘，為了更了解甜品世界，近日已報讀有關課程，準備9月開課，屆時將展開為期一年、約500多小時的課程，問到會否影響工作？苟姑娘笑說：「呢樣係concern，因為我成日飛來飛去，好在老師好好，話miss咗可以補堂，但考試就一定要攞高分，同埋都要合格先可以有證書。」

平日不時會下廚的她，表示近日忙於內地拍劇已甚少入廚，問到可懂得煲湯？苟姑娘說：「都識煲中湯，會睇天氣，識得加啲中藥，如果落雨濕濕哋，就會加少少薏米去煲。不過老公好簡單，淨係鍾意飲豬骨湯，有時見佢上賽車場及好多廢氣，就會煲鱷魚湯。」而同場的陳貝兒則完成了法國糕餅烹飪藝術文憑課程，現場獲頒發畢業證書，並分享修讀課程的樂趣。