畀廿皮掟煲？松岡李那爆粗搶Jeana老公

由藝人張建聲﹑松岡李那和何珮瑜（Jeana）演出的向西三部曲壓軸篇《作家的謊言：筆忠誘罪》，近月舉行過多場試映會及優先場，飾演已婚作家的張建聲搭上樓上性感租客松岡李那，松岡瞓身誘惑，打扮性感登堂入室，與扮張建聲老婆的Jeana正面交鋒。在《作家》最新的宣傳片中，師奶Jeana要頑抗搞自己老公的女人，其中一幕松岡更笑住向Jeana爆粗：「我畀番廿皮你，叫個黑鬼嚟X你好冇？」

來自日本的松岡今次在電影中原聲上陣，有賴張建聲親自教授。張建聲在戲中周旋在Jeana與松岡之間，Jeana要扮師奶，本來大好家庭有夫有兒卻要面對小三挑釁，要增肥15磅冇得靚之餘，其角色的情緒演繹變化甚大唔易做，她說：「我要想像自己有一個家庭，太太同老公結婚多年會相處成點？同拍拖時有咩唔同，相處好同住難，遇到小三可以做到幾絕呢？好多都係靠推理出嚟，但都好合理。」