輸波有得着！潘梓鋒獲阿倫欽點獻唱

無綫《東張西望》主持潘梓鋒日前隨明星足球隊到訪武漢參加球賽，到埗後天公不作美不時下雨，最終明星足球隊亦「輸波」，不過卻無損隊友心情，「領隊」譚詠麟（阿倫）更帶隊友往品嘗串燒，盡興而歸。而比賽中場休息時，潘梓鋒獲「欽點」，負責獻唱阿倫歌曲：「阿倫好認真，事前約咗我哋出嚟練歌，要我清唱、逐粒音咁幫我執，真係好大壓力，不過佢有讚我把聲入咪，又話有留意我主持節目，覺得我做得幾好，仲叫我加油。估唔到踢一場波有另類得着，真係獲益良多。」