【減肥有雞味】丁子朗收復六合一腹肌

藝人丁子朗出席明珠台活動，曾練得一身腹肌的他，因早前旅行時大解放不停食，結果換來「六合一」腹肌。近日他積極收復失地，瘋狂做Gym減食量，結果把美美六舊腹肌復原，他說：「之後暑假又有得出去拍嘢，所以真係要好勤力Keep，食嘢都要清減，尋晚都只係食白烚雞胸飯，依家成身好有『雞』肉味道，年尾又可能有機會再同森美去拍節目。（有咩新嘢畀人睇？）上次都畀人見晒，都煩惱緊有咩新鮮嘢，可能到時騷背肌囉！」