去布吉度假影靚相！李施嬅跳防雨舞求天晴

藝人李施嬅最近孖住好姊妹胡蓓蔚同趙希洛，飛咗去布吉度假，實行叉足電準備返嚟重拍《法證先鋒IV》。繼日前一班姊妹輪流晒水着，呢日施嬅就玩女神風，換上紅色飄逸長裙，喺酒店一望無際嘅泳池邊喪影靚相，實行過足超模癮！

不過似乎當地天氣未如理想，搞到施嬅勁擔心，仲自爆要跳番隻防雨舞：「聽人講呢度有個職業叫RainStopper，可以幫客人跳隻防雨舞，就會好大機會陽光普照，話通常搞戶外婚禮都會這樣做，我就惟有試吓跳防雨舞。太陽伯伯，明天我要曬太陽啊。」見佢手舞足蹈揈嚟揈去，雖然未知成效如何，但就娛樂性十足。另外，佢又同兩位姊妹大歎下午茶，淨係睇佢哋個滿足樣，就知啲嘢有幾好味啦。