專登減肥晒水着！陳約臨去墾丁被嫌皮膚白

藝人陳約臨（Kelly）早前再次拍攝無綫節目《3日2夜》，今次去台灣墾丁嘅佢，大呼好開心，事前更特意減肥，希望上鏡可以更靚。

之前Kelly去蘇梅拍攝時，已經要上山下海，佢透露呢次都離唔開水：「比起上次蘇梅多咗水上活動，反而食嘢就比較少。」而擁有一身古銅色皮膚嘅佢，自爆被當地人嫌太白，令佢哭笑不得：「平時我喺香港皮膚已經叫黑，身邊有唔少朋友叫我做『黑版鄭希怡』，點知我去到墾丁，當地人話我皮膚白，話我唔夠黑，我聽到都覺得好搞笑！」

今次來去匆匆，Kelly話有機會一定要再去墾丁：「我未去過墾丁，但我覺得好好玩，好似一個小夏威夷，係一個講普通話嘅夏威夷，啲水又清又藍，感覺係去咗個好近嘅地方度假，有機會我都想再嚟。」