《愛．回家》大解放！蘇韻姿「膊」老命搶Fo

處境劇《愛．回家之開心速遞》大受歡迎，最近更踩過界拍綜藝節目，而喺尋晚播出一集中，多位女子組成員包括「熊心如」蘇韻姿、「熊若水」呂慧儀、「垃圾清」周梓盈等大晒泳裝，而男子組「Terry」李偉健、「鐵面陳」王致狄、「歸蜀明」繆家慶等就赤膊上陣騷肌，相當有睇頭。

呢日蘇韻姿亦有喺社交網大晒當日拍攝泳裝場口嘅花絮相，當中雖然佢嘅打扮未算性感，但佢晒出靚靚膊頭，成功搶焦。佢亦有與同劇演員逐一合照，原來因為平時喺劇中佢甚少同「威龍百貨」嘅同事同場，所以就把握機會集郵。