《愛．回家》鐵面陳點穴忍屎　網友勁Like

藝人王致狄（Andy）憑《愛．回家之開心速遞》中「鐵面陳」一角人氣急升，佢喺劇中與「Rebeeca」沈可欣嘅感情線更備受觀眾期待，而日前播出嘅最新一集入面，雖然Andy只係得短短分幾鐘嘅戲份，卻意外引起網民熱烈討論，令佢喜出望外。

劇情講到Andy食錯嘢肚痛，但為咗讓廁所畀沈可欣，就用點穴封住便意，無厘頭得嚟又不失搞笑，即獲大批網民激讚編劇有創意，又指估唔到Andy咁有搞笑天分，更表示希望現實中都可以遇到好似「鐵面陳」咁有風度嘅男人，紛紛力推Andy做男神。

東網聯絡上Andy，佢對於劇集出街後有咁大回響相當驚喜，指非常感激網民嘅支持，又大爆原來拍攝時已經笑料百出：「拍嗰陣已經全廠人都喺度笑，連我同沈可欣都幾經辛苦先忍到笑完成呢場戲，所以都好期待出嚟嘅效果，好在觀眾都好受落，真係全靠一班編劇寫咗呢場咁好笑嘅戲畀我哋，我都好希望嚟緊可以帶多啲歡樂畀每一位支持我哋嘅觀眾。」