對定親家！林盛斌囝囝係吳若希囡囡男友仔？

藝人林盛斌（Bob）日前趁天氣炎熱，相約好友吳若希（Jinny）帶小朋友去泳池戲水消暑。今日喺社交網上載一張細仔Jaye同Jinny囡囡Giselle嘅合照，相中兩個小朋友坐喺水中，Jaye仲將隻手搭落Giselle膊頭，另一隻手就放喺Giselle大腿上。

作為爸爸嘅Bob固然為阿仔周詳地計劃將來，看準機會即要求同Jinny對親家：「阿親家，啲禮金嗰度收順少少OK？」點知就引嚟「親家老爺」何兆鴻（Alex）獅子開大口：「貝沙灣3房單位走唔甩～工人司機助手加7位數字現金應該冇咩難道。」而Jinny亦夫唱婦隨留言：「摸完大髀呢條數都係基本嫁（㗎）啦！」不過都啱嘅，佢哋屋企暫時得一粒女，當然要畀阿女過最好嘅生活啦！