黃翠如冧爆派餅卡　由老公蕭正楠親自設計

剛於峇里補辦婚禮的藝人黃翠如現身無綫節目《娛樂大家》錄影，期間向工作人員派發囍餅卡，一臉冧樣透露餅卡上的蘋果樹圖案，乃由老公蕭正楠（阿蕭）一手一腳設計，圖案更是二人的愛情由來，故別具意義，問到翠如可欣賞老公構思？她說：「好過冇，夠簡單幾好。（出年利是封都係蘋果樹？）好提議。（仲沉醉緊新婚喜悅？）佢已經投入咗另一角色，只可以我自己繼續玩，不過我都傾緊一個旅遊節目，成事就會同洪永城一齊去，都有4年幾冇同佢開個節目。」

談到阿蕭將與曹永廉於9月舉行演唱會，翠如聞言笑說：「都幾得人驚，兩個男人可以好朋友到咁嘅形式出現，佢哋去過好多次Trip，仲多過我同阿蕭，結婚佢做伴郎，大部分時間都企我哋中間，好感動、好開心咁。（第時你生仔跟埋入產房剪臍帶？）跟跟吓會唔會佢自己有咗？（到時演唱會上台？）冇邀請，佢兩個嘅世界未必想我喺度。」