朋友以為得25歲　麥皓兒向美魔女進發

藝人麥皓兒（Joey）最近忙於拍劇，甚少出席公開場合，不過一班粉絲依然對佢非常上心，昨日Joey（3日）31歲生日，粉絲們更齊集為佢大搞生日會，令佢直言相當感動：「早排劇接劇一直夾唔到時間，搞到班粉絲只有一個星期去籌備，佢哋由book場、布置場地都一手包辦，唔單止訂造咗個生日蛋糕畀我，上面嘅公仔仲要係按照我之前某個造型嚟設計，真係非常特別。」

至於講到生日禮物，Joey就笑指粉絲「愛屋及烏」，連男友丘梓謙（Ivan）都有受惠：「佢哋知我平時多首飾，專誠訂造咗個首飾盒畀我，上面有好多我唔同造型嘅公仔裝飾，最搞笑係上面仲有埋Ivan嘅公仔，佢哋話係特登整嚟陪住我，搞笑得嚟亦相當有心思。」雖然Joey已踏入31歲，但佢就笑言身邊朋友都誤會佢只有25歲，令佢非常開心，更希望可以keep住童顏，將來要以「美魔女」作為目標。