巴士巡唱！譚詠麟熱到底褲濕晒

樂壇校長譚詠麟與一班環球歌手，包括李幸倪、麥家瑜、陳逸璇、趙浚承、周殷廷及符致逸，在香港大球場場外舉行《音樂夏令型》巴士巡唱，眾人在巴士上合唱，然後之後巴士會駛到中環、銅鑼灣及尖沙咀演唱。講到今次這個模式唱歌，校長表示以前試過，但冇咁熱：「25歲實得，後生仔唔怕。（喺大球場外唱唔怕嘈畀人投訴？）冇事，咁嘅音量。」見他大汗疊細汗，他笑言底褲都濕埋：「一次性嗰啲都用咗一打，自己用，或送畀人都有。」

他表示今次是為了新碟搞巡唱：「環球大手筆冇限量支持隻碟。（隻碟用咗幾錢？）一定係七位數字以上，真係不惜工本，同埋6首歌首歌都有串聯，我嗰啲MV部分就拍晒，但導演都碌咗十幾張人情卡，有啲好出名嘅藝人拍，不過我唔知係邊個。」他謂新碟同6個歌手合唱：「其實係上年搵咗素人寫歌，仲有好嘅作品用得着，唔好嘥，就搵咗啲歌手合唱。」問到6個歌手資源會分配公平？他說：「係㗎，希望唔好有投訴，環球製造咗好融洽嘅氣氛，好耐冇見過。」