把握時間享天倫!郭富城自爆湊女秘密

2019年06月06日 21:05
東網電視
更多新聞短片
郭富城把握時間享天倫。

影帝郭富城(城城)以開幕嘉賓身份出席「第十三屆鮮浪潮國際短片節」的揭幕禮,正忙於舉行巡演的城城,現時未有電影工作在身,故一空閒便捉緊時間享天倫之樂,陪伴愛妻以及兩名小公主,他微笑自爆秘密:「之前同咗大寶去海洋公園,遲啲會同佢去迪士尼,呢啲都係大人少去,但係小朋友嘅天堂。」話內行間散發慈父氣息,問到同大寶去街時二寶交由邊個湊?城城話:「有家傭同外母,好放心畀佢哋湊,佢哋打點得好好,唔會擔心。」

一向支持新進導演的城城表示近年與超過10位新導演合作:「有香港、內地、台灣嘅,最緊要係自己夾個劇本,新導演畀我嘅感覺係好有創意,喺創作上有新元素、多元化啲,會嘗試啲未拍過嘅嘢,充滿新鮮嘅力量,不得不談《踏血尋梅》我係以想不到會為戲拎獎(第35屆香港電影金像獎「最佳男主角」)。」

講到新進導演開戲往往都是較低製作成本,問到會否主動減片酬演出?城城坦言肯定會:「某程度上都會因應環境去遷就,如果真係要去成就一個新導演嘅時候,自己都要有心理準備,覺得呢樣嘢唔係太大問題,喺電影圈咁多年,盡力去幫有心發展嘅新血,電影業先會蓬勃、先有好嘅電影出現,所以無論係新進導演定編劇都會全力支持。」有試過唔收住片酬,拍完先再計?城城指所有「前期工作」、洽談片酬工作都交由經理人小美負責:「呢啲細節都係交畀佢傾,佢會避重就輕,亦好尊重人才,覺得同新導演合作係緣分。」

導演杜琪峯主持揭幕禮,當主持人問到杜琪峯主辦短片節13、又拍下不少電影,是否進入收成期?他爆笑神回:「係時候收皮。」笑爆全場!繼而感謝身為開幕嘉賓的城城出席支持,並鼓勵新一代導演,不厭其煩表示:「講咗13年,都係要重複講,做導演好需要創意,原創最重要係唔好抄!再講一次唔好抄,抄就唔係創作,希望各位導演堅持原創。」
首年參與短片節的城城,大讚杜琪峯是好導演,因對方多年來致力發掘新導演,又有感電視圈需要新血加入:「希望同業嘅演員繼續支持發掘新人才,自己都同超過10位新導演合作。」更呼籲各位學生、新進導演如有劇本不妨交給他,有機會便可合作:「當仲未有人認識你嘅時候要堅持,充滿熱誠、心血,成功就指日可待。」