取代黃心穎！湯洛雯中「不瘦降」減到灰

無綫重頭劇《法證先鋒IV》因黃心穎和許志安的偷食事件影響，原本黃心穎的角色由湯洛雯接手重拍，湯洛雯與黃浩然晚上在觀塘海濱開工拍攝傾偈文戲。

開工三日的湯洛雯受訪說：「之前第一日開工好緊張，但係慢慢同啲工作人員、導演、演員多啲交流，依家會冇咁緊張，最記得第一日開工緊張到成日食螺絲，情況非常嚴重，哈哈。」

湯洛雯自嘲記性麻麻，要多做功課熟讀劇本，又感謝劇中最多對手戲的黃浩然、譚俊彥協助，她說：「黃浩然同埋譚俊彥都好有耐性幫我，令到我冇咁大壓力，好感恩有佢哋做拍檔。」

講到監製為她定下的減肥目標是否已經達標？湯洛雯笑說：「開工會容易瘦啲，因為唔夠瞓，自己亦會食得健康啲，但係依家都唔諗減肥問題，我呢個插班生首要係努力演好角色先。」