目標110磅！黃榕集中火力操美臀

藝人黃榕（Gloria）出席健康博覽，之前在健美比賽中勇奪亞軍的她表示九月會捲土重來：「我想練大隻啲，由99磅增磅到110磅，要食多啲雞肉同蛋白質，練肌肉線條，我上次就係輸在唔夠大隻，我死心不息要攞冠軍。（攞到就唔再參加？）唔會，我之前一直係參加本地比賽，如果攞到冠軍就參加外地比賽，例如韓國、日本。（依家操練成點？）我一星期會做五、六日健身，做重量運動同集中操臀部，因為會參加埋美臀小姐比賽。」

Gloria透露稍後會開拍一套網劇，笑言角色是導演為她度身訂造：「我飾演一個有肌肉嘅女仔，喺辦公室做臥底查案，打扮有少少性感啦！都有少少打嘅戲份，所以要上堂學功夫，我好想做打女，覺得好型。」

另外，Gloria自言近期賀爾蒙失調，所以要好好調理身體，禁食垃圾食物：「我之前參加健美比賽，戒鹽戒糖戒澱粉三個月，比賽完當晚就打邊爐又連續食咗幾日自助餐，好似餓鬼投胎咁，依家要節制番，唔可以咁放肆。」