非常後母!蔣祖曼「奴」心勞力湊兩件

2019年06月09日 00:01
東網電視
更多新聞短片
呢位阿媽真係唔話得。

由《使徒行者2》演「黑警」開始到《鐵探》的 「黑幫阿嫂」,蔣祖曼(Joman)成功入屋,人紅自然是非多,早前被拍到與同是已婚的玄學家羅雲龍密會,但她已即時否認緋聞,幸好未有影響其家庭及兩名小朋友!其實Joman早於21歲時,與從事電影幕後的陳卓麒拍拖,期間對方前妻因病去世,遺下年幼的兒子陳滌(Day)。直到29歲那年,她決意與男友結婚,義無反顧帶着繼子Day一同生活,肩負繼母的重任。

玩到出晒汗

現年34歲的Joman在劇中演過警察、黑幫等形象硬朗的角色,但現實的她卻是把仔女放在首位的「仔女奴」。日前,她趁着大仔Day剛完成升中呈分試,加上老公出埠拍戲,獨力帶一對仔女外出「放電」玩餐飽。期間,Joman「大力媽」上身,跟囡囡大玩「騎膊馬」,現年4歲的女兒可可騎在媽媽膊頭上,一時百厭用手蒙住媽咪雙眼,畫面溫馨!酷熱天氣下,兩個細路玩到大汗疊細汗,她即細心地為仔女抹汗。

一家三口由室外玩到室內,兩隻「甩繩馬騮」當走進遊樂場即興奮四散,尤其細女更是滿場飛。Joman見狀即時左右開弓兩邊跑,上演一幕「阿媽追女」,走上走落略見狼狽,被一對仔女玩到氹氹轉。最後,她帶着囡囡睇哥哥射波,Day投籃時有姿勢有實際,甚有運動細胞。三人在場內玩足兩個鐘,仍依依不捨唔願走,Joman不忘陪大仔揀籃球,似乎打算培養他成為籃球健將。期間兩母子有講有笑, 全無代溝,力證感情深厚。

對仔女一視同仁

正所謂「後母唔易做」,Joman當年決意結婚時聽過不少反對聲音,但忠於愛情的她並不介意。由於老公長期在外拍戲,故囝囝的日常生活以及學校活動,大部分時間都由Joman陪在身旁,多年來疼愛有加,最終以真誠贏取他的信任與接納。轉眼間,Day現已12歲大,即使婚後添了妹妹可可,但她對兩兄妹一視同仁,懂事的囝囝更不時主動幫忙照顧妹妹。剛出道時,Joman仍未捱出人氣,同時兼顧事業及家庭以致身心俱疲,但依然咬緊牙關堅持拍攝獨立電影,只希望有天成名後能為子女提供優質的成長環境。