李麗珊忙住整第三張大碟：翻唱歌為主

歌手李麗珊（Lisa）日前以一身排球Look、大騷長腿，化身啦啦隊出席排球比賽直播活動，由中學開始打排球嘅Lisa坦言近呢幾年都少咗打波︰「去到大學都有打，但一出到嚟做嘢就好難約到咁多人一齊、Book場又難，不過都仲係好熱愛呢個運動。（有冇親自去過現場睇波？）有呀，其實每年都想親自去紅館現場睇聯賽，覺得氣氛好好！早幾年我係買咗飛去睇，但咁啱撞正打風就取消咗賽事，係後尾天色好轉就繼續番，不過我最後都冇去到。」

手持三個節目喺手嘅Lisa，正分身趕製第三張個人大碟︰「仲係一個好開頭嘅階段，今年畀之前係遲咗少少開始籌備，因為自己畀個Idea拖遲咗，但都會盡快趕上進度。（都係Hi-Fi碟？）係呀，以翻唱歌為主，同之前嗰兩隻一樣都係有一首新歌！而呢隻新歌我有份參與填詞部分，所以自己都好期待首歌出嚟個效果會係點，亦都想透過歌詞鼓勵大家唔好咁易放棄，同時都代表到我呢幾年嘅諗法。」