唔只周志文周志康 原來呢班巨星都係孖仔!

2019年06月15日 12:00
東網電視
更多新聞短片
大家有冇睇過佢哋作品。

早前播出嘅無綫劇《婚姻合伙人》內容貼地兼搞笑,當中演孖生兄弟嘅陸永同楊明之間嘅化學作用,更獲觀眾大讚冇得輸!其實無綫多年嚟有唔少巨星都演過孖仔,甚至亦有真孖仔同演一套劇集,依家就為大家回顧有邊幾對,絕對睇到大家嘩嘩聲呀!

李克勤黃貫中

歌手李克勤同黃貫中(Paul)喺歌壇地位無庸置疑,不過原來佢哋喺1989年合作過劇集《淘氣雙子星》,當中講自小喺美國生活嘅「查星宇」李克勤回港同孖生細佬「查星宙」Paul重聚嘅校園故事,之後仲一齊鍾意同一個女仔,雖然佢兩個樣貌差好遠,但都係以中間分界嘅髮型示人,加埋個青澀樣,仲有主題曲《逝去日子》同《夢少年》,呢套校園劇真係令人忘不了。

周星馳劉青雲

影帝劉青雲同笑匠周星馳都係參加無綫訓練班出身,拍過唔少經典劇集。二人喺1990年拍攝劇集《孖仔孖心肝》,兩個同樣演孖生兄弟,劇情就講到二人自小失散,機緣巧合住埋同一屋簷下,但唔知對方係親兄弟,當中期間經歷患難,終明白到兄弟嘅可貴。如今兩個喺電影上各有成就,依家青雲繼續幕前發展,星爺就做幕後,兩個要再度拍劇應該都冇咩機會,唔知電影上又會唔會有合作呢?

梁朝偉吳岱融

憑一雙電眼加英俊外貌嘅梁朝偉,多年嚟都係唔少女士心目中嘅男神。1988年佢就同吳岱融喺古裝劇《絕代雙驕》演孖生兄弟,朝偉喺惡人谷中長大,喺十大惡人學習唔同功夫,變得詭計多端,兩兄弟各自成長,由一對仇人變成一對朋友,最終仲要作出生死決鬥,劇集至今相隔31年,相信大家又點會諗到朝偉同吳岱融曾演過孖仔!

李泳豪李泳漢

藝人李家鼎嘅仔李泳漢同李泳豪係真孖生兄弟,兩兄弟由童星出身,分別拍過唔少影視作品。兩兄弟齊齊合作過劇集《誓不低頭》、《絕代雙驕》、《棟篤神探》等,近年李泳漢淡出幕前,幫爸爸李家鼎打理私房菜,兩兄弟仲齊齊拍住上做生意,投資拉麵店,搞得有聲有色。

周志文周志康

2009年參加無綫《超級巨聲》出身嘅孖仔周志文同周志康,兩個樣似到十足,每次同台都令觀眾難分邊個係哥哥同弟弟。兩個曾喺2010年同框拍攝《居家兵團》,演大細孖,實行做番自己。之後兩個亦有合作《潛行狙擊》、《法證先鋒III》等劇,不過現時大孖周志文已離開無綫,自由身發展,暫時觀眾就未能夠睇到佢哋一齊演出。