婚禮紫色做主題　嚴紀雯結婚表演娛賓

前仁濟醫院主席嚴玉麟愛女嚴紀雯（Carmen）下嫁家族經營建材生意嘅Jeffrey Char，繼前日喺酒店註冊行禮後，尋日於同一酒店嘅宴會廳舉行結婚雞尾酒會及晚宴，晚宴廣邀一對新人嘅親朋好友及城中名人，一齊分享佢哋嘅喜悅。

婚禮筵開45席，晚宴主題為「紫色遊園夢」，場內布置浪漫，氣氛溫馨感人。晚宴中一對新人亦為大家準備節目，仲邀請金像獎最佳新人得獎者Crisel Consunji獻唱，希望藉此分享彼此嘅愛同喜悅，場面感動浪漫。