佩服阿仔有理想!陳美齡寄語爭取更好未來

20190619
東網電視
更多新聞短片
陳美齡三個仔都好叻仔!
曾風靡港日的歌手陳美齡(Agnes)大仔和平、二仔昇平和孻子協平,連媽媽都是美國史丹福大學的尖子生,日前她在社交網分享舉家到美國出席協平大學畢業禮的喜悅,令不少望子成龍的父母們又感動又羨慕。
Agnes接受長途電話訪問時,談及成為模範媽媽的感受:「真係唔敢相信咁快三個仔都已經大學畢業,能夠養到佢哋長大成人已經好開心,見到佢哋真係可以實現夢想、達成目標,我覺得非常幸運,其實係仔仔好努力,唔怕艱苦,好有耐心咁去爭取,大學畢業唔代表一種成就,只係將大學學到嘅嘢再貢獻返社會,同埋點樣做個自立同快樂嘅人,佢哋嘅人生路道只係啱啱開始。」
至於協平大學畢業後的發展,她就話阿仔會繼續留在史丹福大學深造攻讀碩士課程,因為他已經攞到好多學分,應該好快在年底完成碩士。她直言自己會選擇慢慢讀,但兒子想盡快工作:「佢係讀人工智能同計算機科學(Computer Science)會好易搵到工,佢想喺啲世界大公司工作或者幫啲聯合國嘅救援團體手,佢哋嘅理想,我都非常贊成,我都有啲佩服佢。」
Agnes更多謝長子和平給弟弟做了好榜樣,指和平是她第一個兒子,他的路比兩個弟弟行得辛苦:「佢高中、史丹福都係第一個考入去,我都好感恩我個大仔能夠照顧弟弟。」至於二哥昇平是個完美主義者,會用心做好每件事,絕不會中途放棄:「佢依家做工程師好適合,因為要好小心,同埋佢真係要做一件商品出嚟,史丹福大學都有幫過佢。」現時三個仔各有所長,並利用長處自立及貢獻社會,Agnes希望兒子們對未來仍充滿好奇心,繼續有發展空間、夢想,爭取更好的未來。
最後,Agnes想多謝曾支持及幫過她三位兒子的所有朋友:「親戚朋友、我同事都有影響同帶大佢哋,湊小朋友唔係我一個人能做到,有時需要人幫忙,有時教小朋友都需要好多榜樣。」又說看見三個仔站在一起時,作為媽媽會好感動,全世界都想感謝,又勉勵年輕一代的父母鼓勵小朋友追求夢想:「唔使一定要讀名校或大學畢業,只要兒女開心、健康,愛自己,父母就有無限量安慰。」
---------------
立即參加「賞您睇」: http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。