澳洲節目報道BTS　涉種族歧視捱轟

韓團防彈少年團（BTS）爆紅海外，但昨晚澳洲電視台Channel9節目《20 to One》談論BTS時，涉種族歧視而捱轟，女主持介紹排行榜第18位是現時最強勁的BTS，身旁男主持卻說：「真係唔識，聽都未聽過！不過如果北韓領導人金正恩喜歡男團，南北韓就應該唔會開戰！聽講南韓發生爆炸性新聞，仲以為係韓國有大爆炸，原來係講緊防彈，但見到組合，我就覺得不外如是！」

節目嘉賓亦加入嘲諷BTS：「BTS係唯一一隊韓團打入美國排行榜冠軍，但原來得一位成員識講英文，真係神奇！佢哋跳舞好，唱歌就另作別論，都ok嘅！」暗踩成員不諳英語，節目更插播成員Jimin演出時緊張走音的畫面。另一位嘉賓亦就隊長RM去年在聯合國大會以英語演講，並嘲笑當時Gel了頭的RM：「還以為演講內容同噴髮膠有關！」更有嘉賓譏成員是同志：「我有次在TWITTER留言問是否有成員是同志，即被大批BTS迷圍剿，明明當中肯定有成員係Gay，7人中肯定有一名吧，這是數學題！」

因內容涉種族歧視惹爭議後，電視台堅稱只為增加趣味性，沒違反播放守則，並為觀眾帶來不悅致歉，但卻激怒全球粉絲，並在社交網發起＃channel9apologizetoBTS的hashtag活動，要求電視台向BTS致歉。