林穎彤做歌手最怕出醜　利用狄以達開關

藝人林穎彤（Bella）到電台宣傳新歌《忽然又想起你》，她透露明天將首次為大型慈善騷《明愛暖萬心》獻唱：「好緊張！第一次喺呢啲咁華麗嘅show唱live，依家適應緊有歌手朋友，以前都係藝人朋友。（覺得歌手身份有冇唔同？）冇好大唔同，但自己做歌手要準備多啲，練多啲，唔好失禮人，唔好出醜。」

問到可有向好友狄以達請教做歌手心得？她說：「有呀，佢終於可以幫我少少，佢有同我分享經驗，同埋我嚟緊都會錄新歌，係輕快嘅歌，咁佢唱開快歌，所以都會問佢意見。（會唔會叫佢幫手排舞？）都好喎！識咗咁多年，終於有啲利用價值。」問她本身跳舞得唔得？她表示：「都ok，因為學過跳拉丁舞，手腳都協調到。」她又謂對跳舞較有信心，故練唱歌較多：「要下多少少苦功。（覺得自己唱功幾多分？）6分，因為太緊張、硬哂軚，所以要學習放鬆啲，同埋要控制唔好手震，要右手撳住左手。」