客串《愛.回家》獲好評!Bobby再拍無綫劇

20190627
東網電視
更多新聞短片
歐陽震華10月再拍無綫劇。
藝人歐陽震華(Bobby)出席活動,席間分享養身之道。講到日前客串兩集《愛.回家之開心速遞》好評如潮,更有網民大讚好睇過台慶劇,他說:「唔好咁講,少食多滋味,啲人話我好演技,其實現場我要係咁忍笑,次次同群姐情深款款對望,側邊啲人都會喺度笑,唔知笑咩,古裝靚嘅定義,可能係群姐呢啲先靚,楊貴妃都係肥,愈肥愈好!」有參與編劇畀意見?他搖頭否認:「有咁大嘅編劇團隊,落足心機編,如果寫現實劇情就夾硬,講前三世就任寫,避開刻意、猥瑣就得。聽講珍姐(曾勵珍)好滿意,最緊要大家開心。(再拍?)要睇經理人公司放唔放人,好忙嘛,天熱驚中暑,嗰日未適應到開工、又要黐頭套拍通宵好辛苦,配合吓啦,但都唔排除有呢個可能,吊吓大家癮先!」
10月再拍無綫劇
他再自爆稍後10月會重返無綫拍攝時裝警匪劇,又自嘲不是無綫「親生仔」:「係野仔,所以通常食嘅嘢都係野生,對身體特別好。今次返去拍劇都好期待,都有一段時間冇做警察角色,可以再發揮,呢套戲係公司嘅重頭劇。」問跟哪位演員合作?他透露有萬綺雯、陳瀅、楊明和馬德鐘,唯獨是忘記最後一位女主角,問到是否群姐?他謂:「都好喎!可以同公司提議吓擺群姐落去,唔知處境劇放唔放人,可能群姐同萬綺雯爭我,我咩都知,就係唔知醜。」
對於有指他跟太太去海味店買補品,他說:「一個月食幾十萬冬蟲草,當飯食咩?唔係啦!我係去買煲湯材料,話我買冬蟲草、血燕,我連血燕都未見過,養生靠生活正常、飲食定時、睡眠充足。(又話你瑤柱當零食?)梗係講笑,老人家教落買瑤柱係要試少少,睇吓有冇渣,唔係食個啲養命,邊有頂級養命法?」續笑嘲小時候好富貴,口痕的確當瑤柱、蝦米做零食,又指若要轉行會去賣海味:「報道一出啲瑤柱加咗價。」
---------------
立即參加「賞您睇」: http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。