口賤羅力威不停騷擾　陳蕾唱歌喪甩嘴

歌手羅力威繼續孖「星光幫」成員陳蕾一齊宣傳新歌《星光》，參於網上平台音樂直播活動：「Part住佢一齊好開心，絕對係玩多過做嘢。《星光》由我哋把口唱嚟更實至名歸，首歌意思係每個人心目中都有屬於佢哋自己嘅星空、星光。」

口賤但唔傷害人

席間羅力威多次「騷擾」陳蕾唱歌，搞到對方頻頻爆笑甩嘴，他澄清：「呢啲『出錯』係可接受範圍，搵到一個人識笑我啲笑話係好難。」而「受害者」陳蕾抵死笑言：「都唔知點解佢每次講咩我都會笑，就算佢喺其他人面前讚我都想笑。（覺得佢嘅讚賞好虛偽？）唔係，唔知佢讚我嘅時候內心諗咩，唔知係咪曲線讚我。」羅力威就自認「口賤」：「我不嬲講嘢都係賤，但呢個賤唔係傷害人，係氹人開心，見到佢我會肆無忌憚講嘢賤，不過老婆（雨僑）都有叫我唔好講太多，講得多會成真，就唔係有趣。」

唔再討好人專心做自己

羅力威於台上坦言好想出碟，但抱隨緣心態，至於問到是否有計劃開周年騷？他卻表示冇計劃：「我唔識搞呢啲，暫時未見到（有呢個機會），我同陳蕾都淨係識寫歌、唱歌，如果要開騷都想黐住佢開，會開心啲，隨緣啦，要嚟就嚟控制唔到。」續吐心聲指回想過去一味只掛住討好別人，沒有做自己：「以前一直想討好公司、記者、Fans，討好唔到就好易嘈交、反擊，後來慢慢改變，唔再討好任何人做番自己，所有嘢都隨緣。」

---------------

立即參加「賞您睇」： http://bit.ly/2JWKULh

Click下面粒掣，儲on.cc coins！機票、家電、超市禮券、過萬份獎品等緊你。