葉灝基關嘉敏再合作　33度拍MV濕晒

BOP天堂鳥成員葉灝基（Gordon）及BINGO成員Carman（關嘉敏）自網路大電影《穿越愛情綫》後，再度合作拍攝新歌曲《NOW》MV，MV在戶外場地拍攝，加上氣溫高達33度，且兩人又唱又跳，拍攝到中途，兩人已汗流浹背，他們說：「真係拍到連底、衫褲都濕晒。」Gordon亦多謝四位Dancers演出，他又說：「佢哋真係兩肋插刀咁嚟到場幫忙。」

Gordon接受訪問時表示：「其實自己本身對Dance Cover好敏感，因為好怕會有比較，但今次我覺得好好玩，因為唔使自己諗Step之餘，仲可以同一班Friend去玩，香港本身好少男女組合出嚟，所以今次可以再一次同Carman做對手，之前係拍戲，今次係Dance cover，喺電影世界有好多螢幕情侶，大家都好受落，希望日後可以有更多嘅合作，令觀眾可以感受到跳唱方面，都可以有種唔同嘅新鮮感。」

Carman就表示和Gordon合作的歌本是韓文歌，覺得最辛苦不是排舞，而是被熱浪侵襲：「我哋有個場景係喺天台拍嘅，一上到去，曬到連眼都擘唔開，要等兩個鐘，等啲陽光冇咁猛先可以拍，雖然成條片只係拍咗三個鐘，但會見到我哋同啲Dance面都曬到紅晒。」

談及和Gordon再度合作，她就話外界反應好好：「Gordon就好Man，而我啲舞就女性化少少，啲人就覺得我哋好襯，我就覺得第一次合作跳舞都係麻麻，但我啲朋友就話好睇，叫我哋多啲合作。」

---------------

立即參加「賞您睇」： http://bit.ly/2JWKULh

Click下面粒掣，儲on.cc coins！機票、家電、超市禮券、過萬份獎品等緊你。