廿四孝爸爸！張兆輝趕返港為阿女慶生

藝人張兆輝嘅寶貝女張卓姿（Twiggy）昨日15歲生日，佢近日就由英國回港探親，並與一眾親朋好友慶祝。身為廿四孝爸爸嘅張兆輝，即使最近忙於喺橫店拍攝新劇，都專誠抽空回港陪囡囡過生日！佢喺社交網上載多張囡囡嘅生日靚相，當中見張兆輝用心布置屋企，又準備生日蛋糕，認真有心。而張兆煇大仔張卓鏗 （Edison）以及其他表姐妹都有出席，佢哋仲化身「人肉三文治」，疊埋一齊合照，畫面溫馨。而張兆輝亦有留言，向囡囡送上生日祝福：「今年终於可以同我的寶貝珠過生日了，我的寶貝珠15歲生日快樂，願你健康快樂成長。Happy birthday, my lovely daughter（生日快樂，我的寶貝女）」

張兆輝接受東網訪問，佢透露近日喺橫店拍劇，因天氣炎熱關係搞到病咗，佢話：「除咗熱，又不停落雨，而我喺套劇入面要着軍甲，所以焗到病咗，不過我都挨到返香港先睇醫生。」佢話阿女喺英國返香港，加上佢15歲生日，就算自己患病都返香港同阿女慶生：「一年冇見囡囡，估唔到佢已經長得咁高，有5尺8、9吋，同埋因為佢喺英國好忙，要慢慢適應生活，不過見佢成績有進步，我都覺得好安慰，幾咁辛苦都值得。」

相中見到好多布置，張兆輝爆係Twiggy表姐妹嘅心思：「佢哋貼咗阿女嘅偶像同最愛嘅人嘅相喺牆上，當中有韓國男團防彈少年團（BTS）嘅隊長RM同成員Jin，同埋我呀!」

---------------

立即參加「賞您睇」：　http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。