去深圳出活動 黎耀祥怕遇襲:藝人冇得防

2019年07月21日 02:47
東網電視
更多新聞短片
做得藝人冇辦法。

藝人黎耀祥到電視城錄影《流行經典50年》,表示首次上此節目:「胡楓點名要嚟撐佢,我少喺電視唱歌,費事獻醜,要係幾百萬人面前唱,仲要錄低,所以都有少少壓力,尋日到今日都排咗四、五次,從來冇試過咁認真,明明《紅蝴蝶》呢首歌唱咗幾百次都要排,今次仲要有埋二胡同古箏伴奏。」

講到任達華在內地出活動遇襲,他表示明天都會上深圳出席好友書展活動,睇到華哥新聞都很擔心:「呢啲突發情況華哥已經反應好快,如果第二個反應唔切畀佢捅多兩吓。(你有冇試過啲驚險事?)又冇,比較熱情就有,拉拉扯扯,但呢啲就擺明係攻擊,有時推推撞撞都有嘅,但咁多年都未聽過藝人上台畀人刻意攻擊,出埋武器,背後總有啲原因,希望保安做好啲,上台小心啲,藝人冇法防範。(有冇試過有人衝上台?)梗係有,不過都係攬或握手、趕極唔走,係鍾意你但唔係傷害你。」

問到明天上深圳家人可有擔心?他表示:「都唔會,呢行食江湖飯,宣傳或搵食活動都要做,所以冇話擔唔擔心,以前去啲夜場或三山五嶽都係咁,不過好多冇惡意傷害。(你有咩保護方法?)冇架,自己小心,有啲人埋身望住對手有冇攞武器,大家要機警,有異動就避開,避得兩吋得兩吋。(請保鏢?)唔得,保得幾多,互動唔可以唔畀人行埋身,如果下次着西裝上嚟捅你都得㗎。(學拳術?)不嬲有兩道,食過夜粥,拍過武俠片,好彩華哥都係咋,一縮一擋,希望佢快啲康復啦。」

---------------
立即參加「賞您睇」:http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。