郭富城有意搞慈善車展晒珍藏 鼓勵實踐夢想

2019年07月25日 20:29
東網電視
更多新聞短片
相信唔少人想睇城城嘅名車收藏!

天王郭富城到澳門新濠天地,出席首個亞洲珍品展覽「奢迷空間」活動,展覽上全是億萬富豪的超級玩具,包括飛機、車、遊艇等珍藏。其中戴黑超的城城在私人訂製飛機上型爆登場,表示小時候夢想是做飛機師:「可惜冇做到,電影入面都未做過飛機師,頭先坐上呢架私人小型飛機個心都卟卟跳!」心情興奮的他更笑言想揸走架飛機。之後他又坐上在電影《黑超特警組》出現過的防彈裝甲車體驗,又去了參觀電動遊艇,表示:「5、6年前考咗船牌,我都有自己船,有時工作壓力大開船就會忘記煩惱。」

第一架車已值二百多萬

受訪時城城坦言心儀該架私人小型飛機,笑言想將它擺去自己天台,問到飛機幾錢?他表示:「唔知喎,但唔係想像中天文數字咁貴。(對你來講咋嘛?)喺飛機系列嚟講就係唔係咁貴,不過做演員嘅好處就係可以透過角色感受自己嘅夢想。」講到他一向有收藏名車,他表示:「用多年努力去買啲自己鍾意嘅嘢獎勵自己,如果唔係就係白活,我記得細個係收藏膠手錶同埋汽水蓋,但唔同階段就有能力買唔同嘢,記得出嚟做嘢開完香港第一個演唱會,就買咗第一架車,紀念自己開咗26場演唱會,當時架車都成二百幾萬,依家都仲喺度。」

慈善車展 適當時候才舉行

問到現時收藏了幾多架車?他笑言:「唔講住,但希望將來可以開個慈善展覽將啲車展出,話畀未有夢想嘅朋友聽,想要希望得到嘅物件需要大量努力,一步步實踐,鼓勵大家要有正面思想同有夢想,我自己都要努力,依家都未有能力買到頭先嗰啲展品,所以呢個將會成為人生推動力。」問到想幾時開展覽?他只謂:「睇timing,暫時未係適當時候。」而問到可有為囡囡收藏甚麼物品?他表示:「都係啲金鈪、吊墜、平安鎖,好多哥哥、姐姐送咗呢啲畀佢哋,大個咗就會畀番佢哋。」另外講到他繼張學友後,成為新進「逃犯剋星」,他笑言:「睇到新聞好詫異,擘大個口唔識回應。」

---------------
立即參加「賞您睇」: http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。