Dear Jane開騷玩除衫　Tim晒麒麟臂辣㷫粉絲

樂隊Dear Jane昨晚於會展開騷，唱畢《永遠飛行模式》，身穿乾濕褸的成員Howie向Fans申請除褸：「太熱啦！差啲裏面熟咗！」令全場爆笑！當然全場Fans都不介意他脫衣，主音Tim更「捨身」奉陪，更先脫為敬，露出一雙麒麟臂，全場Fans即時尖叫！然後眾人睇到台下有Fans舉起寫有鼓手Nice的燈牌時，其他成員笑爆話：「好犀利！鼓手都有尊嚴！」去到個唱尾聲，Dear Jane眾成員向台下拋毛巾派福利，炒熱現場氣氛！

騷後眾人於後台受訪，均表示今次能夠開騷全因緣分，又開心謂好滿意Fans全場都報以熱情反應。講到Tim於個唱期間翻唱女歌手的情歌時不夠少女味，他抵死笑話：「我拎唔晒出嚟啫！（唔拎出嚟留番做咩？）驚會唔舒服。（你唔舒服？）驚有人唔舒服，哈哈！（唱少女情歌反應咁好，有諗過轉吓路線？）我哋隊Band咩都玩，會新嘗試！」至於Howie就話希望將來有更多與其他歌手Crossover的演唱會演出。

---------------

立即參加「賞您睇」： http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。