放棄休息為歌迷補場 祖兒突拉張信哲上台

2019年08月13日 02:24
東網電視
更多新聞短片
祖兒突然拉張信哲上台合唱,搞到信哲嚇一嚇。

今晚繼續舉行第八場入行20周年假紅館騷《PRETTY CRAZY JOEY YUNG CONCERT TOUR》的天后容祖兒,亦是為頭場的補場日,事關頭場演出時連番出現機件故障,故祖兒寧犧牲休息日都要「Take Two」重唱,並保持每晚風格,與全場Fans大合唱!

「希望唔會有第三次」

甫開騷當祖兒見到全場Fans都「返回座位」上支持自己,感觸地說:「唔知點解,今晚特別感動!」又抵死笑說:「今晚係好特別嘅晚上,特別場!未試過一張飛可以睇兩次!無論你今晚係唔係第二次嚟睇,我希望唔會有第三次,哈哈!唔好意思又叫你哋下個星期又再嚟!無論你睇第幾次,作為今晚嘅主場,我一定盡我努力去演出,令大家有兩小時開心嘅感覺,多謝你哋!」全場Fans拍爛手掌歡呼。


「我同張信哲好有緣」

來到個唱中段,之前每晚祖兒都會邀請嘉賓合唱,但由於今晚是特別補場,祖兒亦特別處理,捨棄嘉賓,即場邀請正在台下投入睇騷的好友上台。其老闆英皇集團主席楊受成和影星張家輝都有前來捧場,祖兒跟觀眾說:「第一晚嘉賓係張學友,大家都記得啦。唔係以為今晚都係佢呀?神呀,點會連續兩次來同你哋玩?你哋係咪傻㗎?哈哈……張學友就冇啦,我睇吓先,張學友個『細佬』就喺度……張家輝!」家輝也大方揭起Cap帽跟大家打招呼,祖兒謂:「講唱歌未必係佢強項。(觀眾大叫家輝上台)唔好搞佢,不如我哋視線再移兩個位,嘩, 呢度到有另一個姓張,台灣歌手張信哲先生。」並邀請張信哲上台,全場即時起哄!

身穿一身粉紅色西裝套裝的張信哲,面對臨時被「召喚」,他都嚇一嚇,一開始於台下耍手擰頭婉拒,祖兒就開始說服他:「喺好多年前佢都同我做過音樂會,又合作做過《我是歌手》,我同張信哲好有緣㗎!佢好似好耐冇喺香港演出,你得嘅!你開緊巡迴演唱會,把聲都開晒啦!」

之後祖兒帶領全場Fans大叫「張信哲」……最後他都敵不過祖兒的誠意上台,然後尷尬說:「哎呀!我沒有要來當嘉賓!我是來幫你加油呀!你的演唱會導演也是我的巡唱導演!我來幫你們打氣,我被嚇倒啦!」祖兒接話:「沒關係!你整個人都好Ready,整個紛紅色,大家說帥不帥?」Fans齊聲回答:「帥!」阿哲神回:「帥我承認啦!但是沒準備!」雖然口裏一直說不,但最後都跟祖兒合唱首本名曲《愛如潮水》,唱畢祖兒當然唔輕易放走張信哲,再用廣東話合唱多一首金曲《習慣失戀》,炒熱現場氣氛!
---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。