任賢齊組隊去沙漠 張家輝:有冇洗手間先?

2019年08月18日 22:55
東網電視
更多新聞短片
洗手間真係好緊要!

影帝張家輝、任賢齊、陳家樂、郭晉安及吳卓羲出席新片《沉默的證人》首映,心情大佳的家輝走向兩邊粉絲任集郵,眼見戲中演反派的家樂一身泥黃色打扮,即笑說:「你『黃』咗嘞!」令人忍俊不禁。

談到近日太太關詠荷帶女兒上街卻獨欠他,家輝抵死謂:「佢哋慣咗啦,不過我公幹返港,都會一家人去出食餐飯嘅。(今年暑假同囡囡去邊玩?)今年比較遺憾,我去唔到,因為手頭上有啲嘢搞,不過佢都慣咗我少喺屋企。」反而小齊近日比較清閒,可以探父母。家輝又搞笑謂:「我見你成日有活動去親近大自然,下次可唔可以帶埋我去?」小齊即答:「近日想去個沙漠,幾十年前畀人發現時,啲人仲好似生活喺明清時代咁!」自認捱得的家輝即笑問:「咁有冇洗手間先?如果唔係好難搞喎!」

戲中二人不時對打,家輝直言雖然小齊平日少拍動作戲,但身手有潛質。小齊卻謂:「都試過因為天氣太冷、做完熱身好快cool down,郁兩吓就傷咗筋鍵,用咗拐杖個幾月,搞到大家要就我,拍咗文戲先。」家輝即鼓勵他說:「當年我拍《激戰》,夠未去到戲肉就斷咗手指啦。」談到日前去欣賞容祖兒演唱會卻拒絕上台,家輝解釋:「我都冇準備,做嘉賓要練吓歌先得,我連衫都冇時間買。下次小齊請我做嘉賓嘅話,我會有充足準備。」