畀沙虱蟲蟲包圍 李施嬅陳山聰談情毛管戙

20190922
東網電視
更多新聞短片
諗起都覺得核突!
無綫熱播劇《金宵大廈》每集劇情緊湊,問到女主角李施嬅想挑戰邊個單元角色?佢認真考慮話︰「每一個單元故事都好吸引。」但唯獨對陸永同譚凱琪演嘅性交轉運單元耍手擰頭︰「睇到個劇本心諗又嚟?咁多床上戲,又嚟?得唔得㗎?好激!呢個NO,哈哈!劇本寫得好大膽,自己都好期待睇。」
另外李施嬅仲點名趙希洛,話佢飾演嘅「何太」都好癲︰「我依家仲笑緊佢,佢個角色好變態!我係最鍾意我自己嗰個,有個單元係講60年代,嗰個最鍾意、年代係共患難,有患難先有浪漫,佢哋嗰種浪漫唔係得個講字,喺TVB比較少見,二人一同經歷一件好難忘嘅事,有黑幫追殺,我為咗救另一半要爆人樽,咁剛烈嘅女人,嗰種愛係激烈到我會為你劈友。(自己本身談戀愛都會咁激烈?)有需要我都會Jump in,大家一齊得就要同甘共苦,有試過拍拖,去到啲驚驚哋嘅地方,有諗過如果遇到襲擊,我都會打番轉頭,反而咩都唔做,之後嘅痛苦同內疚係仲多,愛一個人係會義無反顧。」
提到拍攝趣事,李施嬅劇透會有一場同陳山聰喺沙灘上嘅談情戲︰「好乾柴烈火!係喺夜晚拍,成個沙灘都係啲沙虱、蟻、蟲,睇到四周圍都郁緊,好毛管戙!但係我哋要好浪漫、又要Kiss,其實係Feel到有嘢爬上嚟,成身都好痕!對呢場戲好深刻,未試過夜晚去沙灘,好恐怖,唔知以前啲人點喺沙灘談情。」
---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。