性感演出嚇親自己 李昭南向性騷擾Say No

20191014
東網電視
更多新聞短片
陳俞希、李昭南同小占齊齊合作新劇《假設性無罪》。
藝人陳俞希(Hailey)、李昭南(Mishy)和英健朗(小占)早前首次合作拍攝Viu TV新劇《假設性無罪》,他們首次參演以性騷擾為題材的劇集,三人均指角色相當有發揮,是難忘之作。
睇Playback勁尷尬
Hailey直言今次角色內心戲較重,比以往更有突破:「我喺劇入面係演王敏奕嘅好朋友,自己亦都係好細膽嘅人,對公司任何同事嘅吩咐都唔會拒絕,同埋有啲我同敏奕嘅場口要講番過往我受到性騷擾嘅經歷,呢啲內心戲都好重,好考演技,係一個好好嘅磨練。」而Mishy則指角色的服裝非常性感,故拍攝初時感到緊張:「劇入面我成日都要對客,啲衫一係好貼身一係就露背脊同事業線,同埋又要出口術嗲啲客,務求幫公司做成生意,因為啲衫咁性感,我記得第一日開工,個個見到我件衫都呆咗,大家都好尷尬,唔敢同我有對視目光,不過之後佢哋習慣咗就當我透明。其中有一場,我要着上超性感嘅衫,之後拍嘅時候,每一個鏡頭都要整一整,個畫面都好震撼,之後睇番playback都覺得尷尬。」
劇集題材貼地外,更有好戲之人張慧儀和以及相隔多年沒有拍劇的梁漢文坐鎮,作為後輩的三人初時大感有壓力,不過原來發現他們均是玩得之人。小占說:「佢哋冇畀壓力我哋,個壓力係自己畀自己,驚自己做得唔好,同埋因為慧儀姐個氣場都好勁 ,唔笑個樣都幾惡,不過原來佢都好玩得,大家戲外又會玩啲小遊戲,輸咗要罰錢,成個團隊都好似一家人好歡樂。」
跟前輩學嘢
雖然戲外歡樂一片,不過三人大讚兩位前輩認真敬業的態度令人敬佩,絕對獲益良多。Hailey說:「我學到係佢哋對演戲嘅態度,好似慧儀姐每次都會mark低自己着咩衫,佢話自己以前冇人幫佢,即使依家有人幫佢跟,但佢都會堅持做,因為我哋係跳拍,有時我自己都會亂咗唔知嗰場戲係着邊套,佢會提番我哋,令我哋知道唔剩係記熟對白就得,呢啲都係演員嘅本分。」小占則指張慧儀教導他在情緒上的連戲,令他更加入戲。
劇中談及性騷擾的話題,當中Mishy在現實中亦有所經歷,她自爆曾收過性器官的相片、不雅錄音和被人偷拍:「自己有過呢啲經歷,試過有次被人偷拍,畀我發現咗,我即刻捉住佢罵,仲發現唔只我係受害者,手機入面仲有其她女仔相,所以我哋希望透過呢套劇話畀人聽,忍受都係一個助長,出聲唔只為自己伸張正義,亦減少受害者出現。」
場地:Mini Hotel
Hailey
Dress:www.girlboss.hk
Hair:king@essensuals.hk
---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。